يوميات ( مها) فالمطبخ!!!

بسم الله الرحمن الرحيم


طبعا انتوا عارفين انى لخمه فالاكل والبطيخ اقصد الطبيخ هههههههه والحركات دى
طبعا انا قولت لا يعنى لا لازم اتعلم بقه اى حاجه فالاجازه دى جبت كشكول فاضى وكل شويه اقعد مع ماما مع عمتو مع اى حد برتاح لاكله واكتب بقه المقادير والطريقه وبجد والله لو حد شافه منكم هيضحك لانى بجد كتباه بالفلاحى العبيط
عشان لما اتجوز اخده معايا بعد 100 سنه كده وعليكو خير


وقولت لازم حبايبى برده يشوفه انا بتعلم ايه
هكتبلكم اى حاجه اتعلمها وكل يوم هكتبلكم الجديد

ياله نقول بسم الله




1-كفتة الفراخ

========
صدور فراخ بانيه تتحط فالكبه مع قلب عيش فينو مع بصله مع قشطه وتنضرب فالكبه او ممكن خلاط
تتوضع بعد كده فالدقيق وبعدين البيض واللبن ثم البقسماط
وتتقلى وبالهنا والشفا




2-الشاورمه

=======
قطع فراخ بانيه مع مسترده وفلفل اسمر
وملح بتقدح الزيت وتحطى فيه الخليط وعليه بصل
وحلقات فلفل اخضر كتير ودقايق وتشليهم ويتعمل ساندوتشات






3-التورلى
========

بصله -بطاطس-كوسه-جذر-فاصوليا خضره-طماطم-بسله

نضرب الطماطم فالخلاط
توضع الحبوب السابقه فالصنيه
يوضع البصل المبشور ويفرم فص توم
وعليه بهارات وفلفل اسمر وملح

تسلق اللحمه نص سليق
وتقطع مكعبات وتضع على الخليط السابق وتضع عليه زيت ثم يوضع
فى الفرن فالطاجن طبعا

وبالهنا والشفا
============================

والى اللقاء مع اكلات جديده من الاكل الى بتعلمه

يوم جديد



اسكالوب بالجبنه الرومى

=============

جبنه رومى فى دقيق ثم فى البيض
ثم البقسماط ونقلى فى الزيت ونطلعه على مناديل

ودايما فالبيض نحط نص ليمونه وفلفل اسمر عشان الزفاره تروح منه




الكبده

====

ندق التوم وعليه ملح ومعلقة مسترده وكمون
وفلفل اسمر وفلفل اخضر حامى
ونحطه فالطاسه فالزيت
وعليه الكبده بالتدريج مع عدم التغطيه ويتقدم
مع سلطة الطحينه





كبده اسكندرانى

========

نقطع الكبده شرايح
ونقدح الزيت وعليه الكبده
وعليه التوم المفروم مع الفلفل المتقطع
وملح وفلفل اسمر
ويشوح مع عدم التغطيه





يتبع

يوم جديد باكلات جديده




الحواوشى ======

عيش شامى ونفتحه وندهنه سمنه
نحط فيه اللحمه المتعصجه
بالبصل والطماطم وفلفل اخضر وبهارات
نلف الرغيف فورقه ونحطه فالصنيه
ثم فالفرن ويكون هادى





طاجن اللحمه بالبصل ===========

تسلق اللحمه ثم تقطع
وعليها فلفل اخضر وشرايح بصل
وعصير طماطم وبهارات وماجوى وتتسوى




سلطة الطحينه =======

نضع الطحينه فطبق وعليها كسبره وكمون
وخل وملح وليمونه وفلفل اسمر
وماء حسب الكميه
ونقلبه لحد ما يتماسك




يتبع